Ճգնաժամը սաստկանում է

«Քարհատմեքենա» ՓԲԸ միակն էր նախկին ԽՍՀՄ-ում`  որպես քարմշակ մեքենաներ արտադրող ձեռնարկություն: Միակն էր տված արտադրանքի ծավալով, որակով եւ ընդհանրապես պրոֆիլով: Հիմա  էլ տված արտադրանքի որակով գործարանն առանձնակի տեղ  է զբաղեցնում: Միայն թե համաշխարհայի ֆինանսատնտեսական ճգնաժամի հասցրած  վնասներին դիմակայել կարծես թե չի հաջողվում: Անգամ լուծարման կոնկրետ ժամկետներ են մատնանշում՝ մինչեւ ապրիլ եթե չհաջողվի գտնել պատվիրատուների, վերջին մեկ –երկու տարիներին վնասով աշխատող ձեռնարկությունն այլեւս չի շարունակի իր  գործունեությունը: Այս  մասին գործարանի աշխատակիցներին զգուշացվել է:

Արտադրության գծով փոխտնօրենը կոնկրետ տվյալներ  է  ներկայացնում. 2007-ին տվել են 889 մլն դրամի արտադրանք,
2008-ին՝ 525, իսկ 2009-ին ընդամենը 29 միլիոն դրամի արտադրանք՝ մոտ 30 անգամ պակաս 2007-ի ցուցանիշից:

Հիմնական պատվիրատու երկրներն են Թուրքմենստանը, Ղազախստանը, Ուկրաինան, սակայն ճգնաժամն այդ երկրներում այնքան զգալի  ազդեցություն է  թողել, որ անգամ պատվիրված հաստոցների գումարը լիարժեք չի  փոխանցվել: Նոր պատվերների մասին խոսելն  այս դեպքում    ավելորդ է : 

Հիշեցնենք, որ 2002-ին  «Ստրոմմաշինան» սեփականաշնորհեց Միջազգային բիզնես կենտրոնը: Նախորդ տարի գործարանը շուրջ 100 մլն դամի չափով  ֆինանսական  օգնություն  է ստացել: Այս տարի նման օժանդակության չեն էլ սպասում այստեղ:
Ի՞նչ են անելու աշխատակցները,  եթե մինչեւ ապրիլ  պատվիրատուներ չհայտնվեն:
«Ստիպված կլինենք փնտրել նոր աշխատատեղեր»,- ասում են ընկերության հին ու փորձառու ախատակիցները: Նրանցից յուրաքանչյուրը ցավով  է  խոսում գործարանի հնարավոր լուծարման մասին:
«Կառավարությունը սակայն անտարբեր   է »,- հավաստում  են այստեղ:   Որեւէ պաշտոնյա չի հետաքրքրվել գործարանի ճակատագարով : Կարծես բոլորի համար միեւնույն   է, որ մոտավոր հաշվարկներով եւս 40 ընտանիք զրկվելու  է  միակ եկամտի աղբյուրից:
 

Համենայնդեպս, գործարանի տնօրինությունը չի շտապում կտրուկ գործողություններ անելուց: Այստեղ բոլորը սպասում են  ՝  գուցե  հրաշքով կարողանան   հաղթեհարել հերթական  ճգնաժամային իրավիճակը եւ դժվարությամբ   երբեմնի հսկայի  աշխատանքը չդադարեցնեն: