Գյումրիում այս օրերին արտակարգ ռեժիմով են աշխատում ՀԷՑ ՓԲԸ «Ղարս» մասնաճյուղը, «Շիրակ ջրմուղկոյուղին» եւ Գազաֆիկացման ու գազամատակարարման Գյումրու մասնաճյուղը: Առատ ձյան ու ցածր ջերմաստիճանի պայմաններում լուրջ խնդիրներ են առաջացել կոմունալ ծառայությունների սպասարկման հարցերում: Սառած ջրագծեր, խողովակների վթարներ. ցուրտ եղանակին չեն դիմանում էլեկտրաէներգիայի հաստ մալուխներն անգամ: Որոշ թաղամասերում մի քանի ժամով հոսանքազրկումն ըստ էլեկտրական ցանցերի «Ղարս» մասնաճյուղի գլխավոր ճարտարագետի պայմանավորված են պատահական ու հաճախակի դարձած վթարներով: Սպասարկող բրիգադները ճիշտ է ժամանակին արձագանքում են ամեն մի վթարի, բայց վերականգնման աշխատանքները փոքր-ինչ դժվարացել են էլցանցի աշխատողների համար, ցուրտ եղանակը թույլ չի տալիս արագ աշխատել: